Encuesta: Coalicion actual no mester bolbe despues di eleccion 2021

Encuesta: Coalicion actual no mester bolbe despues di eleccion 2021

Posted on 10/29/2020 9:59 am AST | Updated on 10/29/2020 3:39 pm AST

ORANJESTAD – E coalicion actual (MEP, POR y RED) no mester bin bek despues di e proximo eleccion pa Parlamento di Aruba na 2021. Por lo menos esaki mayoria di esnan cu a participa den e encuesta mas nobo di noticiacla.com e siman aki ta opina. Nan kier un otro coalicion, cu partidonan nobo. Y cu otro partido, no ta referi na esnan den oposicion actualmente, pasobra nan (oposicion: red) tambe a haya mal punto. Tambe ta notable cu e grupo di hende cu ainda no sa pa ken nan vota, ta basta halto. Y finalmente, segun esnan encuesta, tanto gobierno como Parlamento a maneha e topico hopi actual ainda esta e ‘caso’ di mocion contra awor ex minister Marisol Lopez ‘hopi malo’. 

SI ELECCION TABATA AWE 

 

Un di e preguntanan principal di e encuesta ta cu si en caso eleccion pa Parlamento di Aruba tabata awor, envez di otro aña (2021), kico lo tabata e preferencia di esnan encuesta. Aki e grupo mas grandi cu a yena e parti aki cu a participa (47.05%), a rechaza e gabinete actual den su constelacion actual y kier algo totalmente diferente, sigui pa un gobierno di un solo partido cu tabata 26.48%. E siguiente opcion cu a haya basta voto, tabata e grupo cu no sa ainda pa ken nan vota. E cantidad persona cu a scoge e opcion aki tabata 19.90%, cu ta pone nan na di tres lugar. E dos gruponan cu a sali na ultimo lugar ta e opcion pa laga e coalicion manera cu e ta aworaki (MEP, POR y RED) bolbe despues di e proximo eleccion. Un 3.81% a scoge e opcion aki sigui pa e grupo cu no ta interesa ni den un coalicion di e partidonan di oposicion actual, cu ta 2.76%. E encuesta ta mustra pues cu entre esnan cu a participa, ta cla pa aire nobo, cu partidonan nobo den un forma di coalicion.

MANEHO DI CRISIS

E encuesta ta plantea tambe varios situacion cu gobierno a haya su mes y ainda ta aden, y a puntra esnan cu a participa, con nan ta haya cu gobierno (y uno pa Parlamento) a maneha of ta manehando esaki. Aki tambe gabinete actual no a sobresali, cu excepcion di un crisis, cu ta esun di COVID19. Aki nan a score miho, esta 3.22 for di un escala di 5 unda 1 tabata hopi malo y 5 Hopi. Gobierno no a score bon tampoco cu e situacion di awor ex minister Marisol, unda cu e average cu esnan cu a participa, a duna gobierno un average 1.93 punto di un total maximo di 5 cu tabata posibel. Parlamento tambe a score abou cu un average di 1.68 punto for di un escala di 5 unda 1 tabata hopi malo y 5 hopi bon. Pa loke ta e ultimo situacion, cu ta e negociacion cu Hulanda, Gobierno a score un average di 2.30 punto y for di un escala di 5 unda 1 tabata hopi malo y 5 hopi bon. Pues no mucho bon tampoco. E cantidad di persona cu a participa tabata 1052 y e encuesta tabata habri pa 3 dia. 

 

 

 

 

 

 

 

  • Powered by SETAR