Rey Willem Alexander y famia a bolbe Hulanda despues di critica

Rey Willem Alexander y famia a bolbe Hulanda despues di critica

Posted on 10/17/2020 2:56 pm AST | Updated on 10/17/2020 2:57 pm AST

DEN HAAG – Rey Willem Alexander y su famia a bolbe Hulanda diasabra anochi, ora di Hulanda, un dia despues cu nan a biaha pa Grecia pa vacacion. Asina e portal NOS ta raporta. Tabata pa 9’or di anochi cu e Rey y su famia a bolbe cu buelo comercial di KLM. Un rato despues a hisa e bandera real na Palacio Huis ten Bosch, segun regla ora cu e Rey ta bek na su pais. E Rey y su famia a bolbe debi na e multiple critica cu tabatin pasobra cu el a biaha, mientras cu gobierno ta pidi tur hende keda cas y no bay di vacacion debi na coronavirus. E Rey a reacciona bisando cu nan a mira e comentarionan y cu el a afecta nan y pesey nan a bolbe. Parlamento Hulandes tabata basta disgusta cu e decision di e Rey di bay vacacion. 

 

 

  • Intencion di Hulanda ta pa Aruba completo ta vacuna contra Covid19 pa fin di juni 2021

    Intencion di Hulanda ta pa Aruba completo ta vacuna contra Covid19 pa fin di juni 2021

    DEN HAAG – Hulanda tin e intencion – maske hopi ambicioso pero perfectamente realisabel si tin bon coordinacion – pa Aruba y henter e parti Caribense di Reino ta full vacuna contra e “Virus di Corona” no mas tarda cu fin di Juni 2021. Asina secretario di estado Hulandes Blokhuis, a indica na minister plenipotenciario pa Aruba na Hulanda Guilfred Besaril como parti di e combersacion riba e programa di vacunacion cu ta inicia 15 di februari 2021 na Aruba y otro islanan di Caribe Hulandes. E noticia aki segun Minister Besaril, ta sigur un primicia cu no solamente ta duna Pueblo di Aruba un empuhe positivo den su lucha contra e pandamia, pero ademas ta brinda nos Isla e perspectiva necesario den su esfuerzo di recuperacion economico.

  • Parlamento Hulandes a aproba Toque de Queda entrante diasabra

    Parlamento Hulandes a aproba Toque de Queda entrante diasabra

    DEN HAAG – Parlamento di Hulanda (Tweede Kamer) a aproba implementacion di Toque de Queda entrante diasabra awor, pero cuminsando 9’or di anochi envez di 8:30pm. Mayoria di Tweede Kamer a vota pro diahuebs despues di un debate riba e tema, y gabinete demisionario Rutte III a bay di acuerdo cu e cambio aki. Esaki kier men cu entrante diasabra, tur hende (cu excepcion di casonan special) mester keda paden di 9’or di anochi te 4’or y mei di mainta. Segun Mark Rutte, haci e TDQ mas laat cu 9’or no tabatin sentido. E medida mas drastico aki, ta pa combati e variante nobo di e virus Covid19. Potret cortesia ANP. 

  • KLM ta elimina 1000 empleo mas debi na pandemia

    KLM ta elimina 1000 empleo mas debi na pandemia

    AMSTERDAM – E aeroliña KLM ta elimina 1000 empleo mas, riba e cantidad di 500 previamente anuncia. Asina fuentenan ta comparti cu e portal Hulandes Telegraaf diahuebs. E ta un declaracion di e presidente Pieter Elbers na un reunion virtual cu trahadonan. E reduccion specifico lo ta 500 di cabina, 100 piloto y 400 trahado na tera. Tur esaki debi na e medidanan cu recientemente a keda anuncia pa gobierno Hulandes contra e pandemia di Covid19. E cantidad di trahado cu mester bay, lo por aumenta despues di diabierna ora cu e medidanan nobo drenta na vigor, specificamente, exigencia pa double test negativo contra Covid19 prome cu buelo. Cu e medida aki, KLM lo tin cu tene 61 avion na tera. KLM a reduci su personal caba cu 5000 trahado durante e pandemia. 

  • KLM ta stop buelonan di distancia largo entrante diabierna awor

    KLM ta stop buelonan di distancia largo entrante diabierna awor

    SCHIPHOL – KLM ta stop buelonan di distancia largo cu tanto pasahero y carga entrante diabierna. Esaki e aeroliña a anuncia diaranson despues cu gabinete demisionario Rutte a anuncia medidanan specifico extra. Un di e medidanan cu ta afecta e aeroliña ta e hecho cu mester tuma dos test pa biaha bek, cu por tin impacto riba nan personal di cabina. Ademas a prohibi biahamento pa cierto destinacionan di destinacion largo manera Sur America, Cabo Verde y Sur Africa. Esaki debi na e brote di e variante di e virus Covid19. 

  • Hulanda ta preparando Toque de Queda y prohibicion di biahe

    Hulanda ta preparando Toque de Queda y prohibicion di biahe

    DEN HAAG – Pendiente aprobacion di Tweede Kamer, Gabinete demisionario Rutte III ta introduci un Toque de Queda (TDQ) e fin di siman aki pa combati Covid19. Ademas ta introduci un prohibicion di biahe di cierto destinacionan manera Gran Brittania, Sur Africa y Sur America. Tambe ta reduci cantidad di persona pa bishita na 1 pa famia, y reduccion di cantidad na entierro di for di 100 persona te na 50 persona. 

  • Bas van ‘t Wout a reemplasa Eric Wiebes como minister di Economia na Hulanda

    Bas van ‘t Wout a reemplasa Eric Wiebes como minister di Economia na Hulanda

    DEN HAAG – Ex secretario di estado di Asuntonan Social y Trabou Bas van ‘t Wout ta bira e minister nobo di Economia, reemplasando Eric Wiebes cu siman pasa a entrega su retiro per direct ora cu Gabinete Rutte III a entrega su retiro. Rey Willem Alexander diaranson mainta a dune su retiro cu honor (na ‘t Wout) di su funccion anterior y a huramenta su persona diaranson mainta mesora tambe den su funccion nobo na Palacio Noordeinde.  

  • Powered by SETAR