DEN HAAG –Cu vuelo KL 771 a yega awe mainta e prome grupo di studiantenan cu a escohe pa bin sigi un estudio avansa na Hulanda. E grupo a consisti di 27 studiante cu lo bai studia na e ciudadnan Zwolle, Deventer y Enschede. Na Schiphol tabata presente functionarionan di Onderwijszaken di Arubahuis, e mentor pa e region aki cu ta sra. Lourdes Bramble-Tromp y miembronan di e Plaatselijke Opvangcommissies (POC). E di dos grupo mientrastanto a sali diadomingo atardi laat tambe, rumbo pa Hulanda.
Pa lunanan Arubahuis a bin ta haci e preparacionnan nesesario pa ricibi nos studiantenan cu ta bin Hulanda. E aña aki henter e operacion pa guia e binimento di e studiantenan mester a cana segun e protocol na Hulanda pa loke ta covid 19. Minister Plenipotenciario Guillfred Besaril ta contento di mira cu Arubahuis a logra na haci un bon trabao riba e tereno aki. ‘E situacion cu covid 19 a trece un reto grandi cune pa mira con nos por logra haci e trabao aki di tur aña conforme e situacion actual. Hopi procedura cu nos a custumbra cune, mester a keda adapta. Esaki ta encera no unicamente e parti logistico, pero tambe e programa di “opvang” den e ciudadnan, asina Minister Plenipotenciario Guillfred Besaril a bisa.
Un punto importante den e maneho di minister Besaril ta pa duna informacion na e studiantenan pro-me cu nan bin Hulanda pa asina nan ta mihor prepara. Esaki tabata sosode durante encuentronan na luna di juni na Aruba, pero e situacion cu covid 19 a pone cu e aña aki meste a bin cu adaptacion. Minister Besaril: ‘Arubahuis a tene un serie di webinar pa e grupo di studiantenan cu ta biniendo Hulanda. Akinan Arubahuis conhuntamente cu otro stakeholdersnan a duna informacion valioso na e studiantenan prome cu nan a subi avion pa Hulanda. Nos preocupacion mayor keto bai ta keda pa e studiantenan ta wordo bon ricibi y haya e guia nesesario den nan prome lunannan na Hulanda. Y esey mi por bisa cu Arubahuis semper a sabi di brinda riab e tereno aki un servicio profesional, conhunta-mente cu nos team di mentornan y nan POCnan,’ asina Minister Plenipotenciario Guillfred Besaril a bisa.
Dialuna 3 di augustus lo yega e di dos grupo cu ta consisti di 90 studiante, mientras cu un dia despues esta diamars 4 di augustus e ultimo grupo lo yega Hulanda. Aki ta trata di 88 studiante.
HILVERSUM – E conocido presentadora di television Hulandes, conoci mas pa e presentacion di e noticianan di Sinterklaas, Dieuwertje Blok (66) ta retira di su funcion. Esaki pasobra e mester haci un operacion cu ta cambia su apariencia. E mester laga amputa su nanishi pa evita cu cancer detecta, ta plama mas leu den su curpa. Asina e la informa den un entrevista na e corant Volkskrant. Cu e entrevista, e ta purba prepara hende pa e ‘spanto grandi’ manera e mes ta yama e situacion.
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.