Veterinario Croes: Si bo tin COVID-19, limita contacto cu bo mascota

Veterinario Croes: Si bo tin COVID-19, limita contacto cu bo mascota

Posted on 03/25/2020 5:17 pm AST | Updated on 03/25/2020 5:22 pm AST

ORANJESTAD – E manera cu COVID-19 ta plama ta resultado di transmision entre hende cu hende. Te cu e fecha di awe no tin ningun evidencia cu mascota ta plama e malesa. Asina veterinario Irene Croes a bisa. Segun Croes, berdad cu infeccion cu coronavirus (CoV) ta comun den hende y den bestia, pero tin hopi diferente tipo di corona virus y solamente algun tipo ta un “zoönose”, pues transmitible entre hende cu bestia. 

Scientificonan ta opina cu e corona virus cu ta causa COVID-19 (SARS-CoV-2) por ta number 7 di e famia di coronaviridae cu ta un zoönose door cu e tin hopi similaridad cu un coronavirus cu ta wordo haya den un di e especienan di raton di anochi (Rhinolophus spp.) pero no tin evidencia scientifico suficiente pa por identifica e origen di e corona virus nobo aki of pa splica e ruta original di transmision for di animal pa hende. 

Tin tipo di CoV cu ta afecta specificamente cacho so (Canine CoV) y tin cu ta afecta pushi so (Feline CoV); esakinan no por wordo transmiti pa hende.

Na Hong Kong, 3 cacho a wordo poni den cuarantena di cual 2 a test positivo pa cu e CoV nobo aki cu ta causa COVID-19. E prome a wordo poni den cuarantena ora su doño a wordo hospitalisa pa via di COVID-19. Den vuarantena a test e cacho y e tambe a test positivo pa e CoV nobo aki. Door di esaki autoridadnan a dicidi di tuma e medida cu tur cacho di personanan cu wordo diagnostica cu COVID-19 lo wordo poni den cuarantena pa test. Asina nan a quarantine 2 otro cacho di un otro pashent di COVID-19, di cual 1 so a test positivo. 

Niun cacho cu a test positivo a bira malo di e virus aki cu ta causa COVID-19 den hende. 

Segun informacion oficial di OIE (World Organization for Animal Health) ta trata di contacto hopi intimo di doño cu mascota cu lo por a transmiti e virus pa e nanishi di e cachonan, pero mas investigacion ta tumando luga riba esaki. 

Veterinario oficial Irene Croes: “Aki na Aruba cachonan tin diferente rol den nan famia. E relacion por ta uno intimo como “gezelschapshond” of uno menos intimo como “waakhond”. Tur regla basico di hygiena mester wordo considera ora di atende cu bo mascota. Si bo tin COVID-19 ta recomendabel pa bo limita contacto cu bo mascota of laga otro hende atende cu bo mascota pa bo. Si no tin otro hende pa atende cu ne, corda laba man frecuentemente prome y depues di atende cu ne y si por, bisti un mondkapje tambe, pero sigur: no sunchi e, no lag’e lembe bo cara ni boca ni nanishi y no dun’e resto di bo cuminda. Tur esaki pa evita contagio pa bo cacho.”

E prome cacho di Hong Kong cual tawata un Pomeranian di 17 aña, a wordo entrega bek na su famia den bon salud despues di a test 2 biaha negativo. Berdad e la fayece despues di algun dia, pero considerando su edad y cu aparentemente su doño stima a fayece di e COVID-19, ta hopi mas probable cu e la fayece di algun condicion medico pre-existente of di tristesa, contrario di informacion inoficial cu tawata circula den rednan social cual tawata specula cu e lo a muri di COVID-19. 

Segun informacion di e departamento AFCD di Hong Kong (Agriculture, Fisheries and Conservation Department), e di 2 cacho cu a test positivo ta un Duitse Herder y esun cu a test negativo ta un mixed breed. 

“Na Aruba nos tin hopi cacho crioyo tambe, pues mixed breed, pues no tin ningun necesidad di deshaci di bo mascota den e panico pa cu e corona virus aki, pasobra esey ya caba ta un mal custumber cu hopi doño tin ora nan no kier nan mascota mas. Manera OIE ta bisa, no por hustifica pa tuma medida contra ningun mascota cu por compromete nan bienestar. Stima bo mascota. Den e tempo dificil aki di social distancing, e amor incondicional cu bo ta ricibi a cambio ta hopi bon bini. Si bo no tin un mascota y bo ta un doño responsabel, nos shelternan ta yen di candidato cu bo lo por adopta pa brinda bo e amor ey”, segun Irene Croes.

  • Encuesta: Mayoria chikito na Aruba ta pro pa registra matrimonio mesun sexo

    Encuesta: Mayoria chikito na Aruba ta pro pa registra matrimonio mesun sexo

    ORANJESTAD – Un sentencia recien di corte, ta toca e tema di matrimonio di mesun sexo, y mas specifico, su registracion na Aruba. Corte den un sentencia recien a hala atencion di gobierno cu nan no ta actuando corecto pa wanta e decision si por registra un pareha di mesun sexo na Aruba. Nan ta bisa si, cu corte no por impone y dicidi pa gobierno. 

  • Programa na Telearuba diahuebs riba e reapertura di nos Turismo

    Programa na Telearuba diahuebs riba e reapertura di nos Turismo

    (ADVERTORIAL)

  • SMOA: A haya keho di bullying entre docentenan di Colegio Arubano

    SMOA: A haya keho di bullying entre docentenan di Colegio Arubano

    ORANJESTAD - Directiva (di SMOA) a haya keho di bullying entre docente foi diferente docente y por actua cu man duro pa stop esaki ya cu esaki ta contra tur norma y ley. Asina e presidente di e fundacion Robert Croes ta informa pa medio di un comunicado diaranson merdia. Despues cu merdia un grupo di docente a protesta dilanti di e scol, usando entre otro pancarta, e directiva di SMOA a manda e comunicado. Segun e comunicado, ta parse cu tin un grupito di docente cu ta bully otro docente pa firma pa asina hanja poder awo cu e rector a bandona e scol y, ta haci esaki a base di mentiras. 

  • Lockdown ta e ultimo recurso pa un di dos ola di COVID-19

    Lockdown ta e ultimo recurso pa un di dos ola di COVID-19

    ORANJESTAD – Dado caso Aruba haya su mes confronta cu un di dos ola di coronavirus COVID-19, lo no bay resorta na un lockdown mesora manera a haci 3  luna pasa, sino mas bien lo usa esaki com ultimo remedio. Asina miembro di e COVID-19 Crisis Team di Aruba Sharlene Koolman a bisa recientemente durante un briefing. Esaki ta contesta e preocupacion cu e.o. AHATA a expresa recientemente riba e tema. 

  • Comunicado: Docentenan di Colegio Arubano kier retiro di directiva

    Comunicado: Docentenan di Colegio Arubano kier retiro di directiva

    ORANJESTAD – “E docentenan di Colegio Arubano ta mustra nan preocupacion relaciona cu crisis cu directiva (SVOA)”. Asina un comunicado di prensa ta bisa riba e situacion na Colegio. E comunicado no ta specifica si ta tur docente, of con grandi e grupo aki ta. E ta papia solamente di e problemanan cu segun e docentenan, ta tocando e scol. 

  • Gobierno a pidi Wardacosta yuda proteha costa di Aruba

    Gobierno a pidi Wardacosta yuda proteha costa di Aruba

    ORANJESTAD - Defensa di Caribe (entre otro Warda Costa) a bini cu su Unmanned Aerial Vehicle (UAV) cual ta un vehiculo cu lo haci vuelonan riba lama pa vigila y controla e fronteranan di Aruba.  Gobierno di Aruba a habri e economia interno y ta de-escalando e medidanan di COVID-19. Manera ta conoci, Aruba parce di tin e COVID-19 bou di control y como resultado na e momento aki tin zero caso di COVID-19 riba nos isla. Segun gobierno, ta di sumo importancia pa sigui traha y biba den e normal nobo pa por garantisa e economia sigui crece pa e pais y su habitantenan su desaroyo. Pa hasi esaki posibel mester proteha nos pais entre otro di lanchanan cu por yega nos isla ku posibel fuentenan di COVID-19 na bordo cu ta drenta e isla na un forma descontrola.

  • Powered by SETAR