- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
RDA: Fase 2 di Upgrader Citgo Aruba poni on hold
ORANJESTAD - E Proyecto di Upgrader Fase 2 di Citgo Aruba ta poni on hold a consecuencia di e sancionan di Merca contra PDVSA anuncia 28 di Januari ultimo. Asina presidente di Refineria di Aruba (RdA) su presidente Alvin Koolman a informa diadomingo pa medio di un comunicado. Segun e comunicado, bou di e sancionan aki, companianan Mericano (manera CITGO, Valero, Chevron etc) por sigui cumpra crudo venezolano, pero e pagonan mester wordo poni den un “blocked account” cu ta preveni aceso na e regimen Maduro. Citgo su refinerianan na Merca por sigui opera, pero nan ingreso mester wordo deposita den un “escrow account” na Merca. Mas aleu, OFAC ta considera e Proyecto di Upgrader na Citgo Aruba uno cu ta pa beneficio di PDVSA y cu trabounan pa e Proyecto aki no por continua y mester stop ariba 27 di Februari pa 12.01 AM. E consecuencia ta cu tur trahadornan asigna na Fase 2 ta bai cas. Esaki a keda participa na RdA y Gobierno di Aruba (GoA) e siman aki. Sinembargo, operacion di Citgo Aruba ta keda mientras GoA y RdA ta hasiendo tur lo necesario pa evita cu e proyecto di Upgrader wordo poni on hold.
SANCION A KEDA E PESO
E periodo for di 2016 te na e momentonan aki, pa loke ta e processo pa reapertura di e Refineria bou regimen di Maduro tabata y ta dificil. Pa motibo di e diferente sancionan existente ariba e regimen di Maduro y personanan concerni. Apesar cu a studia diferente posibilidadnan pa logra haya financiamento. Hopi a wordo evalua y hasi pero semper e sancionan a keda e peso pa haya financiamento pa e start-up di e proyecto pa e Refineria. Aunke cu e proyecto enberdad ta hopi atractivo, e geo-politica den e regimen Maduro ta hasi cu e ta casi imposibel pa por haya un instituto finaciero pa por hasi e proyecto aki factibel.
KITA REFINERIA DI CITGO
Di otro banda tin voznan ta sugeri pa kita e Refineria for di Citgo, y opera e Refineria nos mes. Si acaso hasi esaki, lo causa un “incumplimento di contract”, y al fin al cabo lo bo mester di Venezuela toch pa su crudo extra pisa pa por opera como Upgrader ya su como refneria e “business case” no ta atractivo. Sinembargo, tabata ser considera 2 opcion, cu ta 1. Bai cu un otro petrolera y 2. Si berdaderamente bin un cambio den Gobierno di Venezuela. Si bin un cambio den gobierno di Venezuela, a wordo anuncia caba cu e sancionan lo wordo lanta y no tin duda cu e Proyecto Citgo Aruba lo haya e prioridad pa ser ehecuta. Tene na cuenta cu ya mas di 50 paisnan, incluyendo Merca y Hulanda, a reconoce e Presidente interino Guaido.
CONSECUENCIA DI SANCION
Kiko e sancionan nobo a causa cu e operacion di Aruba? Te prome cu e sancionan nobo aki a bin na vigor, Citgo Aruba su operacion ta wordo financia door di e benta di productonan petrolera di Citgo cu mester paga PDVSA pa e crudo procesa. Mensualmente, PDVSA ta autoriza Citgo Petroleum pa paga PDV-Holding cierto suma pa varios entidadnan incluyendo pa Citgo Aruba Holding por cubri gastonan di operacion di su tres filialnan na Aruba. Cu e sancionan nobo esaki no por mas. Citgo Petroleum mester deposita tur e suma pa e crudo procesa di PDVSA den un blocked account. Pa Citgo Aruba Holding haya e placa necesario pa su operacion, OFAC mester wordo convensi cu PDVSA no wordo beneficia y asina otorga un licensia pa Citgo Aruba.
HOLDING
Mester recorda cu PDV-Holding ta un compania di Delaware cu ta donjo di Citgo Petroleum Holding. Citgo Petroleum Holding ta e donjo di Citgo Petroleum Refinery y tur e bienes di Citgo Petroleum Company. Citgo Aruba Holding ta resorta bou di PDV- Holding, cu tambe ta un compania americano, unda Citgo Aruba Holding ta donjo di Citgo Aruba Refinery, Citgo Aruba Marine y Citgo Aruba Terminal. E companianan aki ta lease e facilidadnan for di Refineria di Aruba N.V. (RdA).
PROYECTO
Finalmente, Koolman a enfatisa un biaha mas cu e Proyecto di Citgo Aruba como Upgrader di crudo extra pisa di Venezuela ta uno di sumo importancia pa Venezuela como pa Aruba. “ No tin duda cu e Proyecto aki lo sigui, pero pa awor nos ta den un fase unda geo-politica ta causa un paro di e Proyecto aki temporalmente. RdA, GoA y Citgo Aruba ta den discussion constante cu varios instancianan internacional pa sigura cu Citgo Aruba haya e fondonan necesario pa sigui cu e Proyecto di Upgrader y asina reactiva Fase 2. Nos tur ta trahando cu determinacion pa realiza e Proyecto tan importante aki pa ambos pais” e comunicado di Koolman ta finalisa bisando.
KVK: Mayoria compania ta pensa cu e scarsedad di trahado lo empeora
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
Mas turista Colombiano ta biahando pa Corsou envez di Aruba den 2024
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
Pa aña 2024 y 2025, ATIA lo enfoca mas riba e tema laboral
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
Aruba Bank ta presenta un serie di entrevista cu su Mortgage Advisors – “Caweta di Hipoteca”
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Aruba ta den e top 5 pa loke ta e hafnan pa crucero den Caribe
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.
Follow NoticiaCla
