Acuerdo confirma pa dispensa cierto grupo e cobransa di Serlimar

Acuerdo confirma pa dispensa cierto grupo e cobransa di Serlimar

Posted on 10/10/2018 3:53 pm AST | Updated on 10/10/2018 4:24 pm AST

ORANJESTAD – Despues cu algun siman pasa sindicato FTA a duna NoticiaCla e primicia di e intencion pa dispensa cierto gruponan den comunidad di Aruba cu cobransa di Serlimar, e siman aki minister encarga cu Serlimar esta Otmar Oduber a confirma pa NoticiaCla cu e deal ta cla y aproba. E mandatario a confirma cu pa tres grupo specifico tin tarifa special, diferente cu esun general di 25 florin cu a acorda algun siman pasa cu lo cobra tur hende entrante 1 di maart 2019. Un di e tres, no ta bay paga nada, y e otronan ta bay averigua cuanto exactamente lo por cobra nan. A compronde cu tur esaki a sosode cu consensus di varios sindicato, fuera di FTA, unda cu tur ta riba e mesun liña pa cu e forma di cobransa aki. 

E GRUPONAN

E mandatario a bisa NoticiaCla cu berdad, manera cu NoticiaCla a raporta, algun siman pasa el a sinta cu president di sindicato FTA Hubert Dirksz y a traha riba un proposicion pa asisti algun grupo den comunidad cu lo por tin problema pa paga pa Serlimar recohe sushi di cas. E tempo ey, Dirksz a bisa NoticiaCla cu e tabata un proposicion cu FTA ta sostene pero cu mester a keda aproba pa gobierno. Esey pues awor ta confirma. Ta trata di e grupo di persona cu ta ricibi solamente AOV tur luna, cu ta basicamente e grupo di pensionado, e grupo di hende cu ta ricibi bijstand/onderstand, y e grupo marginal cu tin dificultad pa paga suma regular. Segun Oduber, pa e grupo cu ta ricibi solamente AOV, nan lo paga solamente 15 florin pa luna. E grupo cu ta ricibi bijstand/onderstand lo tin un nul tariff, osea cu nan no ta paga nada. E grupo otro marginal, lo wak con ta bay cobra nan. Mes momento Oduber a bisa si cu pa loke ta e grupo di AOV, si nan ta biba cu un hende cu si ta gana un salario fin di luna, e regla aki no ta valido y lo cobra e suma ‘normal’ di 25 florin pa luna. 

COBRANSA

Con tin cu cobra esaki, no ta conoci ni confirma ainda segun e mandatario. Sea ta cobra esaki via belastingkantoor, of otro forma, pero esaki tin cu keda cla ainda. Esey lo keda discuti den e proximo simannan, pa despues cuminsa cu un campaña fuerte di concientisacion. 

  • Minister no kier pa prolonga contracto di Ezzard Cilie

    Minister no kier pa prolonga contracto di Ezzard Cilie

    ORANJESTAD – Gobierno no ta desea pa e contracto di e actual director medico di Horacio Oduber Hospital, Ezzard Cilie ora cu e contracto vence na december awor. Asina minister di salud Dangui Oduber a bisa diahuebs mainta durante un conferencia di prensa. Segun Oduber, e lo informa e hunta di supervision pa tene cuenta cu esaki. Mes momento kier pa dentro di 3 luna, tin un director nobo y uno financiero, pa cual lo saca proximamente un aviso di solicitud pa esaki. 

  • Politica na Aruba a cuminsa sinti e impacto di cambio di LAFT

    Politica na Aruba a cuminsa sinti e impacto di cambio di LAFT

    ORANJESTAD –  Mientras cu lider di fraccion di MEP den Parlamento di Aruba Rocco Tjon a reacciona asombra riba e carta cu colegio di supervision di gobierno CAFT a manda pa gobierno diaranson cancelando nan biahe pa Aruba, parlamentario pa AVP Richard Arends ta bisa cu ‘ e reaccion di CAFT tabata di spera’. Gobierno mientrastanto (lesa: minister Xiomara Maduro) ta wardando un reaccion di Rijksministeraad (RMR) y CAFT mescos. Tjon sinembargo no a warda pues, y riba peticion di NoticiaCla, AVP (lesa Richard Arends) tambe a reacciona.

  • Gobierno: Parlamento ta esun responsabel pa cambio di LAFT

    Gobierno: Parlamento ta esun responsabel pa cambio di LAFT

    ORANJESTAD – Parlamento (di Aruba) tin cu responsabilisa su mes pa e cambionan haci na e ley di LAFT siman pasa. Esey ta pensamento di gobierno di Aruba (lesa: prome minister Evelyn Wever Croes y minister Xiomara Maduro) riba e tema aki. Asina tanto Wever Croes como   Maduro a reacciona riba pregunta di NoticiaCla riba e posibel confrontacion cu e cambio di ley por occasiona cu Hulanda. E ley di LAFT ta e base pa cual e colegio di supervision financiero ta funciona. E ley cu ayudo di e amienda presenta pa fraccionnan di gobierno siman pasa, no ta mescos cu e version cu Hulanda a aproba. Y aki ta unda cu spera posibel friccion cu Hulanda awor. Hulanda mientrastanto ‘ta studiando e resultado” di e version nobo di e ley segun e vespertino Amigoe.

  • Gobierno kier Marina Real yuda cuida nos frontera

    Gobierno kier Marina Real yuda cuida nos frontera

    ORANJESTAD – Gobierno kier ayudo di Marina Real pa yuda sigura frontera mas ainda cu loke cu e autoridadnan actual ta hacienda caba. Asina minister presidente Evelyn Wever Croes a bisa dialuna durante un conferencia di prensa. Minister Wever a confirma pa NoticiaCla cu e yegada di e ultimo boto cu posibel personanan indocumenta, ta motibo pa cual a dicidi pa pidi e ayudo extra. Mes momento a sigura cu no tin ningun problema cu e trabou cu autoridad actual ta haciendo y cu e ta hopi satisfecho cu e trabou actual. Ta e intencion pa firma un protocol cu Marina Real pa asina haci palabracion concreto di con e acuerdo aki mester tuma lugar, aunke no por a bisa pa ki tempo e control aki lo por keda concretisa. Riba pregunta di NoticiaCla, con kier traha hunto si recientemente tabatin un incidente entre cuerpo policial y marina Real pa presencia di mariniernan arma durante un razzia, e mandatario a bisa cu netamente pesey mester palabra cosnan concreto pa evita cosnan asina. Potret ta di e demonstracion di Marina na Corsou recientemente durante un evento entre marina di Aruba y Corsou. 

  • Gino Winklaar a bira director nobo di KIA

    Gino Winklaar a bira director nobo di KIA

    ORANJESTAD - Diabierna mainta conseho di minister a nombra hoofd inspector Gino Winklaar como e director nobo di KIA pa un periodo di 2 aña. E tin un  trayectoria impresionante y ta conta cu sosten di minister di husticia Andin Bikker. Banda di Winklaar, srs Quandt y Verschuur lo sostene Winklaar cu e labornan. Winklaar a cuminsa su carera 19 aña pasa, y a bay studia na Apeldoorn, y a sigui su trayectoria. Ultimo trabou ta encarga cu e warda di polis na San Nicolas. Segun Winklaar, el a papia cu tanto Quandt y Verschuur y ta conoci cu tin hopi trabou ta wardele. Un di e trabounan ta pa cuminsa prepara e facilidad nobo di KIA. 

  • Parlamento a aproba e ley nobo di LAFT y e amienda

    Parlamento a aproba e ley nobo di LAFT y e amienda

    ORANJESTAD – Cu 11 voto pro y 9 contra, Parlamento diahuebs anochi algo prome cu 7:45pm a aproba tanto e ley nobo di LAFT, como e amienda cu segun e fraccionan MEP, POR y RED ta converti e ley awor si den uno constitucional. Fraccion di AVP den su totalidad a vota contra (9 voto), indicando cu a duna Hulanda mas poder y cu awor Hulanda ta bay gara Aruba pa medio di e protocol. E amienda ta adapta e ley di tal forma cu e ta basicamente 'elimina' e autoridad di Hulanda, cu consecuencia cu CAFT awor ta raporta na Parlamento y Gobierno y no mas na Hulanda. Prome minister Evelyn Wever Croes, contestando pregunta di fraccion di AVP, a sigura cu e no ta spera confrontacion cu Hulanda, ya cu gobierno lo sigui cumpli cu e protocol firma, pues de hecho no tin motibo pa Hulanda crea problema. Unico parlamentario ausente tabata Marisol Lopez Tromp, cu ainda ta sufriendo un quebrante di salud. 

  • aruba airlines
  • casino crystal.high rollers
  • Powered by SETAR