InselAir a atmiti fayo di comunicacion durante retrasonan y a pidi despensa

InselAir a atmiti fayo di comunicacion durante retrasonan y a pidi despensa

Posted on 10/10/2018 11:33 am AST | Updated on 10/10/2018 11:38 am AST

ORANJESTAD/WILLEMSTAD – Director di InselAir International Lars de Brabander personalmente a pidi despensa na usuarionan di e aeroliña diaranson mainta, debi na tur e retrasonan di e ultimo dianan. Den un carta personal, e ta admiti cu a bira obvio cu comunicacion dentro di e compania mes ta laga hopi di desea y cu mester drecha esaki. “Ta nos meta pa prove servicio excepcional na tur ocacion, y na number di InselAir, mi ta hopi sorry cu nos a faya pa cumpli cu esaki na e ocasionan menciona” de Brabander ta bisa. Loke e no ta bisa si, ta kico a causa e retrasonan cu a tuma lugar for di den fin di siman.    

DESPENSA

E carta ta cuminsa cu un despensa di dje mes. “Mi kier a extende mi despensa personal pa e inconveniencia y frustracion, cu hopi di e clientenan di InselAir a experencia debi na retraso y cancelacion di buelo den e ultimo dianan incluyendo awe”, de Brabander ta bisa. E ta splica cu den bista di e industria competitivo di aeroliña, y den e estado actual di economia, e clientenan mester por spera e miho balor pa nan gastonan di biahe.”InselAir ta bringa pa prove e balor aki pa medio di un mix di seguridad di cliente, ta na tempo, servicio professional cu honestidad y comunicacion punctual, tambe ora cu cos no funciona debi na tempo, problema tecnico, limitacion di personal of ekipo (avion) of otro rason cu por crea retraso” e ta sigui bisa. E ta enfoca cu seguridad di e cliente ta primordial. “Nos kier pa biahamento cu nos ta uno conviniente y sin problema” e ta sigui bisa. E ta sigura cu e mes tabata envolvi personalmente den e intentonan pa logra esaki. “A bira obvio cu e comunicacion dentro di InselAir ta laga hopi espacio pa mehoracion” de Brabander ta sigui bisa.

EVALUANDO CAMBIO DI COMUNICACION

“Nos ta evaluando y sigurando cu e proceso di comunicacion mehora, pa asina tur personal ta completamente envolvi y informa, hayando e informacion corecto pa nan por haci nan trabou y percura cu nan por informa e clientenan na tempo, adecuadamente y di un forma transparente. Ta nos meta pa prove servicio excepcional na cada occasion. I na number di InselAir, mi ta hopi sorry cu nos a faya pa haci esaki na e ocasionan aki” e director ta finalisa bisando. E no ta bisa si, kico tabata e motibo di e retrasonan. Lesa e carta di despensa AKI. 

 

 

 

.

  • Hensley Koeiman no ta lider mas di partido MAN na Corsou

    Hensley Koeiman no ta lider mas di partido MAN na Corsou

    WILLEMSTAD - Hensley Koeiman no ta lider mas di partido politico MAN na Corsou. Asina prensa di Corsou ta raporta. Ocho siman pasa el a manda e carta pa directiva di partido, cu ayera a bira conoci. Aparentemente door di e asunto di colega di partido Steve Martina, e carta a keda colga. Motibo di retiro no ta conoci, pero prensa di Corsou ta specula cu e tin di haber cu problema den ministerio di e mandatario, cu ta di asuntonan social. Koeiman ta den exterior aworaki pa un biahe di trabou. Potret cortesia EXTRA. 

  • Abogado a pidi absolucion pa ex minister Jamaloodin den caso Maximus

    Abogado a pidi absolucion pa ex minister Jamaloodin den caso Maximus

    WILLEMSTAD – Despues di 5 ora di defensa, abogado pa ex minister di Corsou George Jamaloodin a pidi absolucion (vrijspraak) pa su cliente diaranson atardi. Durante curso di dia, e abogado Eldon ‘Peppy’ Sulbaran a pinta un cuadro pa huez, unda cu ta purba mustra con ‘inconsistencia y irregularidnan’ a marca e proceso pa su cliente. A malusa trafico di SMS, bin cu redo, falta di prueba, testigo cu despues di dos aña numa ta duna declaracion (VBC), a tilde VBC di bin cu testigo cu ‘no ta existi’, y a gaña riba procesverbaal. Na final di dia, a pidi pues pa libera su cliente ya cu den e caso Maximus, ( y Passaat), e no tin culpabilidad alguno. Den e otro caso di Germanium si su cliente a admiti culpabilidad. 

  • Minister presidente Rhuggenaath ta bay Hulanda toch pa topa RMR

    Minister presidente Rhuggenaath ta bay Hulanda toch pa topa RMR

    WILLEMSTAD – Minister presidente di Corsou Eugene Rhuggenaath y colega ministernan Kenneth Gijsberta y Suzy Romer ta biaha toch pa Hulanda. Asina minister Rhuggenaath a confirma riba su pagina di Facebook diaranson. Segun e mensahe, e ta bisa cu despues cu a cancela e biahe pa papia cu Hulanda e siman aki riba posibel acuerdonan palabra, a dicidi cu basa riba mocion di Parlamento (pa continua toch cu e biahe) ta sigui cu e biahe. No ta conoci si e delegacion ta sali diaranson mes of diahuebs. E hecho ta cu e reunion di Rijksministeraad ta diabierna awor unda cu tin cu dicidi si ta duna Corsou un instruccion (aanwijzing) of no. Manera ta conoci, siman pasa a bira conoci cu Corsou ta poni pa haya un instruccion (aanwijzing) pasobra pa tres aña sigui, Corsou no ta logrando di regla su asuntonan financiero corectamente. Como tal secretario di estado Hulandes Raymond Knops a entrega un proposicion pa un instruccion y diabierna awor RMR ta dicidi riba esaki y ta practicamente un formalidad, a lo menos si Corsou por convence Hulanda otro y cu RMR mes mira aden cu un instruccion no ta apropia aworaki. 

  • OM a pidi 30 aña di prizon pa ex minister George Jamaloodin

    OM a pidi 30 aña di prizon pa ex minister George Jamaloodin

    WILLEMSTAD – Fiscal diamars atardi a pidi 30 aña di castigo di prizon pa ex minister George Jamaloodin pa tur tres caso pa cual e ta sospechoso, esta Germaniun, Passaat y Maximus. Den caso di Maximus ta acuse oficialmente di ta sospechoso di medeplegen tot moord den caso Maximus. A opta pa no pidi bida largo, ‘pasobra esey ta mucho hopi’. For di dialuna corte a cuminsa trata tres caso cu Jamaloodin ta sospechoso di dje, y entre nan tin e caso Maximus. Keda pendiente pa e continuacion di e caso. Den e parti di Germanium, Jamaloodin a admiti culpabilidad pero den e otro dos casonan no. E noticia ta den proceso. Keda pendiente.

  • Ex minister a admiti culpabilidad den caso Germanium na Corsou

    Ex minister a admiti culpabilidad den caso  Germanium na Corsou

    WILLEMSTAD – Pa sorpresa di hopi, ex minister George Jamaloodin a acepta culpabilidad den e caso Germanium dialuna mainta den Corte na Corsou. E ex mandatario ta sospecha di e caso aki, tambe di caso Maximus relaciona cu morto di politico Helmin Wiels y caso Passaat. Awe mainta e caso contra e ex mandatario a cuminsa. Pa sorpresa, el a admiti culpabilidad y a pidi pa dedica resto di e tempo pa atende e otro dos casonan, ya cu contrario na e caso aki, e ta completamente inocente y kier tempo pa por demonstra esey. Huez sinembargo a opta pa continua toch pa trata e caso Germanium completo. 

  • Ex minister Jamaloodin dilanti mesa berde pa asesinato Wiels

    Ex minister Jamaloodin dilanti mesa berde pa asesinato Wiels

    WILLEMSTAD – Corte di prome instancia na Corsou a reserva tres dia pa trata e caso penal contra ex minister George Jamaloodin, cu ta sospecha di por lo menos 3 cargo. Awe mainta 9:30 am Jamaloodin lo presenta dilanti huez, pa e caso cu manera informa, ta poni pa dura por lo menos tres dia. Mayoria di e cargonan contra Jamaloodin ta relaciona cu asesinato di e politico lider di partido Pueblo Soberano Helmin Wiels algun aña pasa. Despues cu a captura Jamaloodin na Venezuela, a translade pa Corsou y finalmente a bay den predetencion na Bonaire pa motibo di seguridad. Awe mainta a trece Corsou pa e confronta y responsabilisa su mes pa e actonan pa cual e ta wordo sospecha di dje. Entre e cargonan, ta cu e lo a duna e ordo pa likida e politico conoci. Jamaloodin tabata minister durante Gabinete Schotte na 2010. 

  • Powered by SETAR