APFA: A yega na areglo cu gobierno pa sigui cu pensioen Serlimar

APFA: A yega na areglo cu gobierno pa sigui cu pensioen Serlimar

Posted on 10/10/2018 11:02 am AST | Updated on 10/10/2018 11:07 am AST

ORANJESTAD – E director di fondo di pensioen APFA Sheila van Veen pa medio di un carta a confirma na e trahadonan diamars cu a yega na un areglo cu gobierno di Aruba y cu e proceso di ‘bouw op pensioen’ ta sigui normal. Esaki contrario na e informacion di siman pasa unda cu APFA a informa cu ta para esaki. Ayera tambe minister di medio ambiente responsabel pa Serlimar, (manera NoticiaCla a raporta caba) a bisa cu ayera ainda tabata ‘trahando riba un solucion’ y cu pa e fin di siman aki, cos lo por ta cla.

CLA CABA

Pero ya ayera APFA a manda un otro carta na e grupo di trahadonan , informando nan cu a reuni extensamente cu gobierno y cu esaki a resulta den palabracion concreto pa loke ta e pago di primanan atrasa na APFA. “Basa riba e palabracionan aki, APFA ta confirma cu bo pensioenopbouw bou di e areglo di NPR 2014, lo no termina”. APFA a gradici tanto gobierno como Serlimar pa e atencion y pa por a resolve e asunto riba termino cortico. 

E PROBLEMA

Manera cu NoticiaCla a raporta den fin di siman, e compania Serlimar Sui Generis tin un suma habri di mas di 2 miyon florin na pago di pensioen pa su trahadonan na APFA. Un carta di APFA pa e trahadonan di Serlimar na e trahadonan, y cu ex minister di medio ambiente Booshi Wever a reproduci e fin di siman cu a pasa, a confirma esaki. Minister actual di medio ambiente Otmar Oduber a confirma esaki tambe pa NoticiaCla den fin di siman, pero a bisa cu ‘gerencia di Serlimar ta atendiendo esaki’. 

E CARTA

Den e carta fecha 5 di October 2018 (siman pasa), APFA ta splica e situacion na e trahadonan, unda cu ta bisa e.o. cu Serlimar tin mas di 90 dia sin deposita placa cu ta wordo kitá for di e empleadonan den e fondo di pensioen di APFA. Segun e acuerdo di financiamento entre APFA y Serlimar, e compania mester contribui cu e pago di prima di pensioen di su trahadonan tur luna, pero tin mas di 3 luna sin deposita. Como tal entrante 1 di November, APFA a  bisa di lo a stop e proceso di acumulacion di pensioen te proximo aviso. Algo cu awor no ta necesario mas. Lesa e ultimo carta AKI. 

REACCION ODUBER

Segun Oduber su reaccion den weekend cu a pasa pa e portal aki, el a admiti cu e tabata trata di un suma di riba 2 miyon florin, y cu e problema aki ta data for di aña 2014 caba. “ Mi a worde informa cu Gerencia Serlimar ta atendiendo esaki. Tambe Gerencia a tene contacto cu ambos sindicato, SEPPA y STA y a pone nan na altura di e situacion” Oduber a sigui bisa.

  • AHATA: Na Mei mayoria di hotel a experiencia un tiki menos ocupacion

    AHATA: Na Mei mayoria di hotel a experiencia un tiki menos ocupacion

    ORANJESTAD - Aruba Hotel & Tourism Association (AHATA)  a acumula e cifranan di ocupacion y prijs di hotelnan pa luna di Mei 2019 y CEO di AHATA Tisa LaSorte a anuncia cu na Mei por mira e ocupacion baha un tiki. Aruba su turismo a experiencia extra crecemento desde e horcannan di September 2017 den Caribe, y awor cu e inventario den Caribe ta habriendo bek ta di spera cu demanda pa Aruba lo normaliza poco poco. Mientrastanto tin bon demanda ainda, pa cual motibo mayoria di hotel por cobra un tarifa mas halto, aunke e balornan den luna di Mei ta mas abou cu e lunanan di high season. 

  • CAFT ta cancela biahe pa Aruba debi na cambio di LAFT

    CAFT ta cancela biahe pa Aruba debi na cambio di LAFT

    ORANJESTAD – E cambio di ley di LAFT a conoce su prome efecto, casi un siman despues cu Parlamento di Aruba a cambia e ley cu pasonan fundamental. E colegio di supervision financiero di Aruba CAFT ta mustra gobierno diaranson riba incumplimento di e protocol firma aña pasa y ta mustra cu nan prome accion ta consecuentemente pa pospone nan bishita proximo pa Aruba. 

  • Maduro: No a dicidi ainda si ta introduci sugar tax na Aruba

    Maduro: No a dicidi ainda si ta introduci sugar tax na Aruba

    ORANJESTAD – Gobierno no ta logra introduci e asina yama ‘sugar tax’ pa 1 di juli 2019. Asina minister di Finanza Xiomara Maduro a confirma pa NoticiaCla. De hecho, no ta sigur mes cu e sugar tax lo keda introduci como un di e impuestonan ‘vicioso’. Esaki pasobra simplemente no a tuma un decision final riba e asunto segun Maduro. Cu e introduccion aki, e impuesto lo mester a genera 16 miyon florin extra pa caha di gobierno. Algo cu awor no ta parse di ta algo sigur. 

  • Maduro: Prijs di gasoline no ta subi e luna aki!

    Maduro: Prijs di gasoline no ta subi e luna aki!

    ORANJESTAD – Manera cu e mandatario di economia a bisa luna pasa, esta Xiomara Maduro, prijs di productonan petrolero, e luna di juni lo no tin subida di prijs di gasoline. E mandatario a anuncia esaki caba luna pasa riba su pagina di Facebook y dialuna (awe) el a confirma esey. Si no a absorba e prijs, lo mester a aumenta e prijs di gasoline cu 7 cent.  E prijs di gasoline ta keda manera luna pasa cu ta lo siguiente. 

  • Periodo di transicion pa kita BBO di recibo, aplasa cu 3 luna mas

    Periodo di transicion pa kita BBO di recibo, aplasa cu 3 luna mas

    ORANJESTAD – Gobierno a dicidi cu nan ta aplasa e periodo di transicion pa kita BBO for di e recibo, cu tres luna. Esaki kier men cu pa entrante 1 di October proximo comerciantenan mester kita e BBO for di recibo. Si no haci esaki nan lo haya un multa pa incumplimento. Inicialmente ora cu aña a bolter, a anuncia como parti di e reforma fiscal, cu ta kita e mencion di BBO riba recibo, pero a duna comercio 6 luna di tempo pa haci e cambionan necesario. Pero gremionan a protesta, indicando cu e no ta suficiente tempo. Basa riba esey, a dicidi awor cu ta cambia e transicion y ta duna 3 luna mas di tempo. 

  • Aruba no ta confirma como destinacion di SBMF pa 2020

    Aruba no ta confirma como destinacion di SBMF pa 2020

    ORANJESTAD – No ta sigur ainda si Soul Beach Music Festival lo tene su di 20 edicion na Aruba. Esaki mientras cu na final di e evento e aña aki, a anuncia cu ta wak tur hende bek pa e di 20 edicion, y ganadornan di pasashi e anochi final a sigura cu nan ta bin bek pa e edicion ey. Segun e organisador Mark Adkins a confirma pa NoticiaCla den fin di siman, ta berdad cu nan no ta sigur cu Aruba lo ta e cede otro aña. Di otro banda, CEO di ATA Ronella TjinAsjoe- Croes a bisa e portal aki cu partidonan ta den negosacion y no tin problema pa bisa cu Aruba ta e sitio, mientras cu ta negoshando ainda. 

  • Powered by SETAR