- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
BCA: Economia di Aruba ta spera subida di 0.3% na 2018
ORANJESTAD - Awe Banco Central di Aruba (BCA) a publica un ‘Economic Outlook’ nobo cu un actualizacion di proyeccionnan pa 2018 y calculacionnan revisa di e PDB pa 2017 reflehando e desaroyonan y datos mas reciente.
E economia di Aruba ta proyecta pa crece den termino real cu 0,3% na 2018. Compara cu e proyeccion anterior, publica na december 2017, e tasa di crecemento a wordo ahusta abou cu 2,4 punto di porcentahe. E proyeccion no ta inclui e impacto di e medidanan fiscal anuncia recientemente pa Gobierno di Aruba pa reduci su deficit financiero, cual a wordo aproba durante e debate di presupuesto 2018 den Parlamento. E efectonan potencial di e medidanan aki riba produccion economico lo wordo considera den e siguiente ciclo di analisis di proyeccionnan.
E calculacion nobo pa e crecemento di e PDB durante 2017 a resulta na 1,2%, considerabelmente mas abou cu e proyeccion anterior (Tabel 1). E retraso substancial di varios proyecto di inversion, particularmente e rehabilitacion di e refineria den un upgrader, tabata un factor importante pa e revision di e tasanan di crecemento pa 2017 y 2018 cu a wordo proyecta anteriormente. Tambe ta spera cu consumo lo permanece abou na 2018.
Actividadnan alentador den exportacion di servicio turistico, causa pa un expansion di yegada di turista di e mercado Mericano cu casi 11%, tabata e conductor principal pa e crecemento economico na 2017. E perspectiva turistico pa 2018 ta positivo den termino di proyeccion di exportacion di servicio turistico cu ta premira pa crece cu 4,4%, empuha primordialmente atrobe pa e mercado Mericano.
Proyectonan significante di inversion grandi cu a wordo (parcialmente) ehecuta na 2017 ta inclui e continuacion di e renovacion di e Dr. Horacio E. Oduber hospital, e Green Corridor, e Watty Vos Boulevard, y actividadnan di mehoracion na e aeropuerto. Sinembargo retrasonan substancial den inversionnan grandi relata na e rehabilitacion di e refineria den un upgrader di crudo –spera pa yega un peak den e di tres trimester di 2017– a causa cambionan significante den proyeccionnan di inversion di BCA . No ta conoci na e momento aki con largo e retrasonan aki lo dura cu lo tin implicacion pa proyeccion di e cifranan di inversion pa 2018.
E cuenta coriente di e balansa di pago ta proyecta pa registra un deficit di Afl. 32,7 miyon na 2018, causa pa importacionnan mas halto di productonan cu no ta relata na crudo. Ta anticipa cu e cuenta di capital y finansa di e balansa di pago lo registra un surplus di Afl. 90,7 miyon, pa gran parti relata na gobierno su fiansanan den exterior pa cubri su deficit financiero.
Consecuentemente, e reserva di divisanan neto (excluyendo revaluacion) ta proyecta pa subi cu Afl. 40,0 miyon na Afl. 1.724,8 miyon na fin di 2018. Ta proyecta cu reservanan total lo yega na 5,2 luna di pagonan di e cuenta coriente.
E reserva di divisanan neto (NFA) ta anticipa pa crece te Afl. 1.780 miyon na final di 2020. E intencion di gobierno pa financia un gran parti di su necesidadnan financiero riba e mercado internacional ta e factor determinante pa e subida proyecta di e NFA. Adicionalmente, ta asumi cu e deficit riba e cuenta coriente lo expande na Afl. 165 miyon na 2020 ya cu e crecemento den ingreso turistico probablemente no lo ta suficiente pa compensa e subida den importacion di bienes. BCA su analisis ta indica cu e capacidad premira actualmente pa obtene divisanan pa e economia Arubano no ta suficiente pa genera reserva di divisa pa paga pa bienes y servicionan importa. Cambionan structural den maneho economico, incluyendo diversificacion economico (mas leu cu refineria y turismo), ta urgentemente necesario pa engrandece e capacidad di e economia pa obtene divisanan, pa asina por structuralmente eleva e nivel di NFA na un manera sostenibel y flexibel.
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
DEACI a otorga mas di 100 permiso pa negoshi nobo caba den 2024
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
Durante Seatrade 2024, islanan ABC a trata esfuersonan pa desaroyo regional
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.
Follow NoticiaCla
