Mike Eman y Mike de Meza a biaha pa St Maarten awe tardi

Mike Eman y Mike de Meza a biaha pa St Maarten awe tardi

Posted on 09/12/2017 8:07 pm AST | Updated on 09/12/2017 11:49 pm AST

ORANJESTAD – Diamars atardi a sali rumbo pa St. Maarten Prome Minister Mike Eman y Minister Mike de Meza den dos diferente vuelo. Den esun prome, riba un avion chikito, ta compaña Premier Eman un delegacion di Comision di Calamidad; mientras cu e di dos cu ta den un avion di PAWA Airlines, a bay Minister de Meza cu e intencion di hiba comestibel y otro necesidad basico y bin bek cu Arubianonan.

E biahe di apenas algun ora ta forma parti di e esfuersonan cu Gabinete Mike Eman II a bin ta haci for di siman pasa, ora cu e menasa di orcan Irma riba e isla di ruman di St. Maarten tabata inminente. Ademas di hiba suministro y trece Arubianonan cu kier regresa Aruba, pero no tabata por pa motibo di falta di conexion aereo, e mandatarionan ta busca pa haya un miho impresion di e situacion, miho contacto cu e autoridadnan local y como resultado, un miho coordinacion di esfuerso humanitario. 

Entre e resultadonan alcansa te aworaki, ta e reestablecimento di conexion aereo cu a cuminsa den fin di siman pa trece urgencianan medico y despues dialuna cu e prome Arubianonan. Ta trata sea di compatriotonan residencia na e isla, of esnan cu a keda pega mientras cu tabata di bishita.

Na di dos luga, ta bayendo tambe cu un gran cantidad di comestibel y awa cu ta necesidad tanto pa e pueblo, como tambe pa nos boluntarionan di Cuerpo Policial Arubiano y Cruz Cora Aruba cu ta brindando na asistencia. Nan a logra transmiti e mensahe di e scarcedad grandi di producto elementario, cu segun e dianan ta pasando, ta birando mas dificil pa nan.

Eman a splica prome cu su salida for di terminal di Aviacion General cu un bes na St. Maarten, ta bay confirma miho kico ta e necesidadnan basico cu St. Maarten tin na e momentonan aki. Esaki ta specialmente importante pasobra e comunicacion entre e comisionnan di calamidad di ambos nacion tabata hopi dificultoso, pero sumamente importante pa e coordinacion di esfuerso. 

“Nos por bay haci un inventarisacion debido di kico ta e necesidadnan cu tin na St. Maarten y con nos por yuda pueblo di St. Maarten cu asistencia medico manera nos ta haciendo na e momentonan aki, asistencia logistico, asistencia tambe den ordo publico cu cuerpo policial y percura tambe pa crea e comunicacion aereo pa esnan cu kier sali di St. Maarten un rato paso e experiencia tabata hopi traumatico,” asina  Eman a duna di conoce.

 

  • Partido AVP ta entama caso sumario contra gobierno

    Partido AVP ta entama caso sumario contra gobierno

    ORANJESTAD – Partido AVP ta hiba gobierno di Aruba corte. Miembro y partido y parlamentario pa e partido berde Richard Arends a confirma esaki pa NoticiaCla. Segun Arends, e motibo ta cu gobierno a prohibi nan di tene un actividad den un di e MFA otro siman diamars. E partido ta mustra cu ta e siman aki mes a firma contract y paga pa e uso di e lugar (MFA Noord), pa un dia despues nan bin tende di e manager di e lugar cu no por tene e evento eynan, pasobra ‘e ta un evento politico’. E partido ta considera esaki sensura, persecucion politico y un medida contra e partido. Nan ta mustra cu recientemente partido RED a tene un evento na e MFA na Paradera, y partido RAIZ tambe a tene un lectura den un di nan. Pues diripiente AVP no por tene un evento eyden. Como tal, a duna abogado instruccion pa entama un caso sumario (mirando e tempo urgente) pa wak si ainda otro siman diamars por tene e evento. Ta trata di evento pa informa pueblo riba e medidanan cu gobierno ta bay tuma entrante 1 di juli. Intento pa haya reaccion di prome minister Evelyn Wever riba e tema, ainda no tabata exitoso.

  • Oduber: Directiva Parke Arikok a haci intento di ‘coup’

    Oduber: Directiva Parke Arikok a haci intento di ‘coup’

    ORANJESTAD – Desde awe mainta Parke Arikok ta manera un barco sin timon. E director di e parke Natasha Silva mes a confirma esaki awe mainta den un carta na e minister encarga Otmar Oduber. E directiva di 4 persona, manera ta conoci caba, a entrega su retiro ‘en bloc’ per direct un dia prome y awe mainta Oduber a reacciona yamando e asunto un ‘coup’ di e directiva, durante un conferencia di prensa. Silva mientrastanto awe mainta a pidi intermediacion di e minister pa por resolve e situacion urgente aki.

  • Proyecto di renobacion di e pier dilanti Riu Antillas ta cla

    Proyecto di renobacion di e pier dilanti Riu Antillas ta cla

    ORANJESTAD – E pier dilanti Riu Antillas a keda completamente renoba. Manera por corda e pier aki tabata den un mal estado, den deteriora y peligroso pa haci uso di dje. E toren manera e ta ser yama den boca di pueblo, ta safe un biaha mas pa uza. Hopi ta nos hendenan local pero tambe e turistanan cu ta haci uso di e toren aki. E proyecto aki a wordo realisa door di un “Public-Private Partnership” conhuntamente cu gerente general di Riu Antillas. “ Di e manera aki Gobierno y sector priva ta traha hunto pa mehora e producto Aruba y den e caso aki sector priva a mustra disponibilidad pa cubri e inversion aki”, gobierno a informa pa medio di un comunicado.

  • Casi 20 edificio di gobierno para bashi sin uso pa nan

    Casi 20 edificio di gobierno para bashi sin uso pa nan

    ORANJESTAD - Actualmente tin un lista di casi 20 edificio di Gobierno cu no ta den uso. For di ministerio di infrastructura, NoticiaCla a compronde cu departamentonan DOW y DIP a hinca un plan den otro awor pa mira kico por wordo haci cu e edificionan aki. Siguientemente lo papia cu cada Ministerio y lo fiha un lista di prioridad considerando cu ta trata mas di 15 mil meter cuadra di propiedad/edificio di Gobierno cu no ta den uso na e momentonan aki.

  • Plataforma di DTP y polis lo combati taxi piratanan

    Plataforma di DTP y polis lo combati taxi piratanan

    ORANJESTAD - Recientemente Minister Chris Romero y su colega di Husticia, Andin Bikker, a reuni cu Departamento di Transporte Publico y Cuerpo Policial pa trata e problematica di taxi pirata. E reunion aki tabatin como meta pa mediante dialogo di ambos Minister y nan departamentonan concerni, crea un maneho mas efectivo y eficiente pa logra combati e problematica aki.

  • Gobierno di Aruba ta sigur cu nan ta prepara pa e temporada di horcan

    Gobierno di Aruba ta sigur cu nan ta prepara pa e temporada di horcan

    ORANJESTAD - Den cuadra di temporada di horcan, Minister President Evelyn Wever-Croes dialuna mainta a reuni cu miembronan di Beleidsteam na Rampenbureau. Esaki ta e organo mas halto ora ta trata calamidad. E Beleidsteam tin un plan di calamidad cu ta inclui Training HUREX 2018. E aña aki ta spera un temporada di horcan average, pues ni hopi ni poco horcan.

  • COMPRA
  • Powered by SETAR