ORANJESTAD - Awe diahuebs merdia pa 12:02 Central di Polis ta haya un yamada cu un atraco a tuma lugar un rato prome na un cas na Warawara. Patruya di polis presenta na e cas di biaha y ta bin conpronde cu ta trata di dos hende homber . Un color cla y un color scur. Nan a papia papiamento. Un di nan tabata tin un arma di candela na unda e la pone riba e señora Chines na e cas y a pidie pa placa. Ta asina cu nan a logra bay cu e cartera di e señora cu ta tin mas o menos afl 500,- y un iphone. Ta asina cu nan lo mester a huy den un auto color shinishi. Atraco Team a yega na e sitio pa asina sigui cu e investigacion y tuma e datosnan. Tambe a pidi slachtofferhulp pa asina guia e señora cu a keda cu un susto. Ken cu por a wak algo yama tiplijn di polis cu ta 11141.
ORANJESTAD – Alto Comisario di polis Ramon Arnhem, ta bay actua contra acusacionan cu e ta considera infunda den su direccion, cu a aparece riba e.o. rednan social. Asina e la sigura den e programa Noticiacla LIVE diamars anochi. E ta considera cu enberdad den su funcion e mester tin lomba hancho y wanta hopi cos, pero den e caso aki, cosnan cu ta infunda y cu por atacha su reputacion y e cuerpo, e tin cu para. Ta trata di acusacion e.o. riba e forma con e la haya auto nobo, y con e la maneha e situacion.
ORANJESTAD – Aruba a conoce su di 5 morto di trafico diadomingo mainta. E melding na polis a bin pa 6’or segun vocero di polis Liliana Rasmijn. Segun Rasmijn, 6’05 central a haya informacion di un accidente cu a tuma lugar na altura di Motor World na Camacuri. E prome informacion tabata cu un auto a bolter riba e caminda y cu e victima ta pega bou di e auto. A pidi ambulance cu urgencia, pero na yegada di e ambulance, a mira cu no por haci mas pa e victima. Pa 7’10am, docter Texier a constata morto di e dama Reina Rosalinda Roga (33). Noticiacla y Cuerpo policial ta manda palabra di forza pa e famia di e fayecido.
PITTSBURGH - Pa mehora e habilidad riba e crimen cibernetico y fortalese e lasonan cu diferente departamentonan investigativo, commisario di polis Robert Candelario hunto cu diferente coleganan den region a forma parti di e congreso “ Disruption 2024” cu a tuma lugar na Pittsburgh Pennsylvania na Merca.
ORANJESTAD - Ayera durante oranan di merdia Wardacosta a bai cu un boto local na e punto di sosten di Wardacosta pa un control abordo. Durante di e control riba e boto dor di e agentenan di Wardacosta y e K-9 unit di Cuerpo Policial di Aruba, a bin encontra diferente pakete cu droga aden. En total a haya 237 kilo di droga di cual 57 kilo marihuana y 180 kilo cocaina. E droga y e dos hombernan, di cual unu local y unu Venezolano a keda entrega na Cuerpo Policial di Aruba.
ORANJESTAD – Diasabra atardi, Aruba a conoce su di 3 morto di trafico pa 2024. Segun informe oficial di polis, awe despues di 4’or atardi Central di Polis a dirigi patruya di Noord, ambulance y cu maximo urgencia pa un accidente pisa na altura di e supermercado NG y e restaurant Yen Yen situa na Kamay. Na yegada di e prome unidad a mira dos auto involucra den e accident. Un auto marca Nissan, modelo almera color shinishi numera A-24490 y un Honda, modelo CRV, color cora numera A-52927.