E aña aki 70 tienda den Caya Grandi por uza  orarionan flexibel

E aña aki 70 tienda den Caya Grandi por uza orarionan flexibel

Posted on 01/11/2017 10:14 am AST | Updated on 01/11/2017 6:34 pm AST

ORANJESTAD- Gabinete Mike Eman a anuncia algun aña atras caba cu a haci cambionan den maneho di otorga e permiso pa expande y flexibilisa orario di tiendanan. “Dunando oido na e preocupacionan di comerciantenan y pa fungi como facilitador, ya caba for di algun aña Gobierno a ahusta e orario di habri y cera di e tiendanan,” minister Arends a declara. 

Den cuadro di e maneho di gobierno pa stimula inversion y actividadnan economico e tiendanan por bin na remarca pa un dispensacion pa por habri te 12’or di anochi di dialuna te cu diabierna. Riba diadomingo y dianan di fiesta tiendanan por bin na remarke pa habri te cu10'or di anochi.  E maneho aki ta vigente for di aña 2012.

Durante e ultimo lunanan Gabinete Mike Eman a tuma accionan pa por aumenta fluho di hende den Caya Grandi necesario pa sostene actividadnan economico den e area aki. “A flexibilisa mas aun e regulacionnan di parkeo, a habri Caya Grandi pa autonan por pasa durante cierto oranan di dia y a coopera hunto cu sector priva pa organisa actividadnan combinando entretenimento y diversion,” minister Arends a bisa. “Den e liña aki ta pas tambe flexibilisacion di orarionan pa habri y cera tiendanan dunando e comercianto maximo oportunidad pa haci negoshi den cuadro di ley.”

Arends a splica cu e permiso pa expande y flexibilisa e orarionan comercial ta wordo duna anualmente. “Pa aña 2017 ya 60 pa 70 tienda por bin na remarca pa aplica pa e orario flexibel aki". Tur doño di tienda cu kier bin na remarke pa e orarionan aki di apertura y ciere di nan negoshi por aplica pa esaki via di Departamento di Asuntonan Economico, Comercio y Industria. E unico dia cu no ta duna dispensacion pa tiendanan -  cu excepcion di esnan den hotel  cu un hotelvergunning -  ta 'Dia di Labor'.

  • Powered by SETAR