Aeropuerto a procesa mas cu 22.200 pasahero den weekend

Aeropuerto a procesa mas cu 22.200 pasahero den weekend

Posted on 01/11/2017 10:00 am AST | Updated on 01/11/2017 10:01 am AST

ORANJESTAD – Aruba Airport Authority N.V. (AAA) a cuminsa 2017 riba un nota positivo considerando e cantidad di pasahero y movecionnan di trafico aereo cu a wordo procesa den e prome fin di siman di 2017, conosi como “Super Weekend”. E prome fin di siman despues di Aña Nobo historicamente ta e temporada mas ocupa pa trafico di pasahero na Aeropuerto Internacional Reina Beatrix mirando e cantidad di pasahero cu ta yega y sali for di Aruba despues di e temporada di fin di aña. NoticiaCla.com mes a tuma nota cu cada 4 minuut un avion tabata aterisa riba p.e. diadomingo. 

BON PLANIFICACION

Un biaha mas bon planificacion y coordinacion entre tur stakeholder, departamento y empleado na aeropuerto tawata sumamente importante pa asina por maneha e cantidad di pasahero y movecion di avion durante e weekend cu a pasa. Un poco mas cu 22.200 pasahero y  316 movecion di trafico aereo (tanto avionnan priva y comercial) a wordo maneha den e periodo di 2 dia. E operacionnan na e nivelnan mas halto di seguridad, hunto cu procesamento eficiente y efectivo di pasahero, a resulta den un experiencia positivo pa e miles di personanan biahando door di nos aeropuerto.  

E resultadonan aki ta tuma un cantidad tremendo di coordinacion, planificacion y compromiso di parti di un cantidad di partner di aeropuerto, y e resultado di e fin di siman tras di lomba no lo por tabata posibel sin e esfuersonan di US Customs and Border Protection, Imigracion Local (IASA), Departamento di Border Police na aeropuerto, Douane di Aruba, Air Navigation Services Aruba N.V. (ANSA), Aruba Tourism Authority (ATA), e aerolineanan, e ground handlernan, Departmento di Transporte Publico (DTP), e taxistanan, operadornan di concession y F&B, ASAP Services, Total Services, FMSA, Universal Aviation FBO, Flexo, Aruba Security and Crime Prevention y e ekipo di AAA entre otro. 

TEAMWORK

CEO di AAA Sr. James Fazio: “Ta di mira atrobe cu bon teamwork cu tur e partnernan di aeropuerto ta sumamente importante pa nos tin un Super Weekend exitoso. Tambe, e ultimo ekiponan tecnologico cu a wordo poni y e cambionan den nos facilidadnan na aeropuerto a yuda tremendamente pa atende e cantidad di pasahero den tempo record. E tabata impresionante pa mira cada empleado bai e extra miya pa sigura e servicio adecua na nos pasaheronan y mi kier gradici cada un persona cu a haci un diferencia durante e Super Weekend! E ta impresionante kico por wordo logra cu e focus y compromiso corecto. Bon trabou tur hende!” Fazio a finalisa bisando. 

 

  • Black Friday Sale ta na Do it Center

     Black Friday Sale ta na Do it Center
  • Buckley :Prome fase di man camp na CITGO Aruba kedando cla

    Buckley :Prome fase di man camp na CITGO Aruba kedando cla

    ORANJESTAD - E prome fase di un 'man camp' pa 1500 trahado ta kedando cla. Asina e interim Vice President y General Manager di CITGO Aruba Raymond Buckley a declara. E cantidad menciona ta necesario pa 9por sostene e proyecto di rehabilitacion. E prome fase ta inclui edificionan cu dormitorio y facilidad di servicio cu por tin te na 400 trahado. E construccion di e man camp (area unda trahadonan ta biba) a impacta e economia di e isla, segun Buckley. Esaki pasobra el a genera trabou pa como 150 trahado local, y tambe actividad pa haya material y servicio. Trabou di e man camp lo continua y ta planea pa keda completa pa e prome cuartal di 2018. 

  • Modelo nobo “Lexus F-Sport Hybrid” ta den showroom caba

    Modelo nobo “Lexus F-Sport Hybrid” ta den showroom caba
  • Arends: Dos aña prome cu por transferi placa entre banco den 'real time'

    Arends: Dos aña prome cu por transferi placa entre banco den 'real time'

    ORANJESTAD - Lo dura por lo menos 2 pa 3 aña ainda prome cu banconan na Aruba por tin e sistema electronico instala y operando pa un cliente por experencia transferencia di placa entre dos diferente banco, den 'real time', osea instantaneo. Asina Richard Arends a bisa NoticiaCla den su ultimo entrevista como minister di Economia recientemente. E proceso ta canando, pero no ta cla ainda pa por implementa e sistema manera cu tin otro parti di mundo. Banco Central ta liderando e proceso di cambio, sostene pa gobierno y banconan comercial local. 

  • Clientenan di DIMAS por paga tur cos awor ey enbes di na dept di Impuesto

    Clientenan di DIMAS por paga tur cos awor ey enbes di na dept di Impuesto

    ORANJESTAD - Clientenan di DIMAS entrante awe, por haci tur nan pagonan necesario na e edificio di DIMAS mes, envez di na departamento di impuesto y of un di e hulpbestuurskantoornan/MFA. Segun e directornan di tanto DIMAS como di impuesto Kathy Paskel y Luenne Pieters, e intencion ta pa duna miho servicio centralisa y evita cu e cliente tin cu bay dos caminda pa keda cla cu su tramitenan. Entre awor y fin di aña, clientenan tin e oportunidad ainda pa acudi na e otro sitionan di custumber menciona. Pero pa januari e unico sitio unda cu por haci e pagonan (Leges, retributie, waarborgsommen), ta na e loket di departamento di impuesto na Dimas mes. Otro punto cu a haci mencion ta cu si antes (te cu fin di aña, por a paga cu placa cash esta placa di papel, esaki lo no por mas, y ta acepta solamente debit card. Un di e motibonan ta e cantidad grandi di placa cu tin cu cana cune, mirando cu e sumanan cu tin cu paga, ta varia entre 100 pa 2500 florin. E intencion ta pa na comienso di aña, clientenan logra paga online tambe. 

  • Edificio di Riu Antillas a cumpli 40 aña di existencia

    Edificio di Riu Antillas a cumpli 40 aña di existencia

    ORANJESTAD - E edificio di Riu Antillas a cumpli 40 aña di existencia y esaki ta algo historico. “Nos ta kere cu ta husto manera nos ta traha duro tur dia, pa celebra e fecha pero tambe pa reconoce esunnan cu tabata tey desde e prome dia y ainda ta trahando den e mesun edificio aki”, asina Juan Blanco, Gerente General di Riu Antillas a expresa. Den e team di Riu Antillas tin empleadonan cu a cuminsa traha den e edificio aki tempo di Aruba Concorde Hotel cu a habri su portanan na 1977. Freddy Molina y Leo Tromp ta empleadonan cu 40 aña pasa a traha na Aruba Concorde Hotel y gerencia di Riu Antillas ta contento di tin empleadonan cu a cuminsa den e edificio aki hopi aña atras. Freddy Molina ta Assistant Beverage Manager y e tin 40 aña trahando den e edificio di Riu Antillas, unda el a cuminsa su carera cu Aruba Concorde Hotel. Alfonso Ariza, Beverage manager, ta traha cu Freddy Molina pa e ultimo 10 añanan cu Riu Antillas y a indica cu Freddy Molina ta un persona tremendo, e ta un bon ehempel. Su dedicacion na servicio, e ta un bon ehempel pa sigui pa tur esunnan cu ta bin despues. E trayecto di Freddy Molina ta uno largo unda el a cuminsa cu Aruba Concorde Hotel. E ta corda con el a pone su pia den e hotel di cual tabata e inicio di Aruba Concorde Hotel y despues di 40 aña e ta den e mesun edificio. “Riu a tuma over e edificio cu un concepto y mi ta agradecido. Mi ta asina contento y poco emociona cu Riu a habri e portanan y tin e portanan habri ainda”, asina el a indica. Ta hopi importante cu e porta di e edificio ta habri ainda y Freddy Molina ta contento cu e por forma parti di nan. Ta hopi importante pa su persona di ta 40 aña den e industria di turismo cu ta e pilar di Aruba. E ta gradicido na Riu Hotel cu e por ta cu nan, na gerencia di e hotel cu por a bin cu un cambio cu ta algo positivo pa Aruba. Carlos Marquez, Assistant Manager di Mantenimiento, ta traha cu Leo Tromp, un trahado di mantenimiento kende ta bay cumpli 40 aña trahando den e edificio di Riu Antillas cu antes tabata Concorde Hotel. “E conoce e edificio mas miho cu nos mes”, asina Carlos Marquez a expresa contento. Leo Tromp ta un persona profesional y ora e traha den tur ramo di mantenimiento, e ta haci un funcion hopi bon. Leo Tromp ta un empleado di departamento di mantenimiento y a recorda su añanan cu el a cuminsa cu Concorde Hotel. Tabatin hopi cos bon y malo, pero el a sigui traha den e mesun edificio pa 40 aña largo. Durante su trayecto den e mesun edificio, el a mira hopi cambio tuma luga. E ta gusta su trabou y tambe yuda su coleganan. “Tur ta bisa pa yuda Leo pa nan tambe siña. Pa asina nan tambe por sigui traha 40 aña”, Leo Tromp a indica. Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion "all inclusive". Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka. Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

  • Powered by SETAR