E meta di AHATA tabata pa hala atencion di ATA y trece cambio

ORANJESTAD - E zet di AHATA pa retira 'en bloc' for di e hunta di supervision di ATA no tabata un acto isola, ni un acto di cada miembro individual. Fuentenan cerca di e proceso a papia a base di anonimidad, debi na regla di confidencialidad. A compronde cu e loke a sosode diaranson tabata un acto delibera pa mustra ATA e malcontento cu AHATA tin pa cu e maneho ultimo tempo den ATA. Y den e caso aki, enberdad e asunto di All Inclusive lo tabata e ultimo gota. 

DESICION DURANTE REUNION

A compronde cu tabata durante un reunion diaranson merdia cu AHATA su miembronan, a tuma e desicion y a acorda eynan cu e 3 miembronan di e hunta di supervision lo a entrega nan retiro 'en bloc', causando un situacion cu lo a hala e atencion suficientemente di ATA y pa asina mustra cu e situacion actual no por a continua. Mientras cu en berdad e operacion di ATA por continua temporalmente, ta conoci cu e situacion ta di tal constelacion cu e operacion den ATA no por continua asina pa largo. Y esey AHATA aparentemente ta bon na altura di dje.

DESICIONAN SIN CONSULTA 

Segun e fuentenan a sigui mustra, algun di e problemanan ta e forma con den ATA tin desicionan ta tumando lugar sin cu AHATA su miembronan di supervision lo tin influencia ariba of ta wordo consulta ariba. Desicionan financiero cu lo a tuma lugar, cu AHATA no ta di acuerdo cu ne. Sumanan di placa cu ta wordo aproba, solamente cu aprobacion di e miembronan di gobierno y e presidente, lagando e miembronan di AHATA afo, y cu a wordo cuestiona. 

FALTA DI RESPET PA MINISTER 

E falta di respet ultimo tempo pa cu AHATA di e mandatario di turismo, tambe AHATA lo tin problema cu ne, unda cu ta mustra cu tin un tipo di powerplay politico tumando lugar, mientras cu AHATA ta purbando di mustra cu e situacion actual no ta bayendo den bon direccion. Como tal, a mustra cu no a keda AHATA nada otro di bin cu un accion asina pa haya atencion serio di ATA y purba asina di mustra cu cos no por a sigui manera cu e tabata. Pues si tabatin cualkier duda cu e tabata un acto independiente, esey no ta e caso. 

NO KIER PERHUDICA TURISMO

NoticiaCla.com a compronde cu e intencion di AHATA no ta pa pa perhudica turismo di Aruba, sino mas bien trece cambio den e forma cu ATA ta wordo maneha y cu nan por tin un 'voz' manera cu e structura a wordo formula 5 aña pasa. Ta conoci cu AHATA a bay di acuerdo cu e structura di un ATA S.G, y cu fondonan di AHATA por bay pa ATA contal cu AHATA haya asiento den e hunta pa asina nan tambe por tin algo di bisa di e fondonan cu AHATA ta contribui cu ne.