ORANJESTAD – Automobilistanan otro aña lo tin cu usa e mesun number cu nan a usa e aña aki, como nan plachi di number. Mientras cu no ta concreto ainda kico exactamente lo sosode cu pago di number di auto otro aña, (posibilidad pa paga e number den accijns di gasoline), un cos pues ta casi sigur cu ta e numbernan di auto den 2016 tambe lo keda blauw. Vocero di departamento di impuesto Meverly Romano a confirma cu e aña aki no a haci bestelling di number di auto pa 2016, mirando e ‘posibel’ cambionan cu ta na caminda. Si dicidi mes cu ta dicidi toch pa ‘pospone’ e cambio di sistema di pago di number di auto, ta laat pa bestel nummerplaat pa 2016 awor. Esey ta nifica cu kico cu pasa, e number blauw ta keda. Ley nobo, of no.
CAMBIO DI FORMA DI PAGA PA NUMBER DI AUTO
Manera cu minister di finanza Angel Bermudez a bisa NoticiaCla.com siman pasa, decision final no a cay ainda kico lo pasa cu e cambio di proceso di paga number di auto, y Romano ta confirma cu tanten cu parlamento no aproba e cambio di ley, e no ta bira vigente. P'esey tambe, Romano awe, a splica cu no por bay den mucho detayes di e ley, pasobra simplemente e detayes no ta conoci ainda. Loke si ta conoci, ta cu otro aña, un cliente no mester paga su impuesto di number na oficina di belasting mas. Pero con exactamente e cambio lo ta, esta con lo controla esaki, no ta conoci. E sistema actual ta cu ora cu bo paga p.e. bo suma completo (cu pa mayoria, ta yega na e suma di 320 florin pa henter aña), bo sa cu bo ta cla y cu bo a cumpli pa e aña. Awor e cambio, no ta conoci con esaki lo funciona, ni con e control lo ta. E unico cos cu sa, ta cu lo bay cobra riba accijns di gasoline, esta cu e concepto di mas bo core, mas bo ta paga.
NO A BESTEL PLACHI 2016
Segun Romano, berdad e intencion ta pa haci un cambio den e ley, di tal forma cu e cliente no ta bay paga e belasting mas manera ta custumber. “Nan lo pag’e den e prijs di gasoline of diesel. Esey ta e intencion”. Romano a mustra cu nan ta prepara pa esey tambe. E plachinan cu mester a wordo besteld pa 2016, no a sosode e biaha aki. Ta debi cu tin posiblemente e cambio di ley, cu e clientenan mester haya un plachi di number completamente nobo. Pero aworaki esey di biaha no ta e caso. “A keda dicidi cu e cliente lo uza e plachi di 2015 den aña 2016 tambe”. E plachi blauw lo use pues den e aña fiscal 2016. “Esey a keda dicidi caba si” Romano a sigui bisa.
CAUTELOSO RIBA DETAYES DI CAMBIO
Atrobe, riba e detayes di e control, Romano tabata poco cauteloso, pasobra nan tambe ta pendiente di e cambio di ley y e procedura. “E pago di belasting no ta bay sosode na departamento di impuesto. Pero tur loke tin di haber cu e registro di e plachinan, ta continua si serca nos” Romano ta bisa. Ta duna como ehempel, cu ora cu un persona cumpra un auto nobo, y e mester un plachi, sea pasobra nan a horta di dje, of el a keda destrui den un accidente, e ta keda haci su peticion na departamento di impuesto, pa por tin un plachi nobo.” E entregamento di plachi, y e procedura pa cu esaki, of trahamento di plachi ta keda tuma lugar serca nos” Romano a continua bisando.
MIAMI – E barco crucero mas nobo di e compania Virgin Voyages su flota Lady, Brilliant Lady lo bishita Aruba for di October 2025 caba. E barco mes ta keda lansa un luna prome na September 2025. E plan ta pa na October 2025 e Sali for di Miami y bishita Aruba, Bonaire, Curaçao, y Cartagena. Brilliant Lady lo bishita lugarnan faborito manera Turks & Caicos, Antigua y Grand Cayman y Ocho Rios na Jamaica. Pues otro barco crucero ta duna Aruba e importancia, y ta inclui nos isla e mesun temporada cu e keda lansa.
ORANJESTAD - Habitantenan di Bucutiweg a comparti nan rabia y disgusto cu nan tabatin pa e hecho cu bishitantenan di e concierto latino diasabra anochi a blokea nan casn y di bisiña. Segun e relato di e habitantenan, tabata alrededor di 8:30 diasabra anochi riba Dia di Rey cu e bisiñanan a nota cu algo straño ta pasando den nan bario. Un cantidad di auto a cuminsa aglomera canto di e caminda riba Bucutiweg cu ta un caminda sin continuidad, pues e ta limita na mas direccion pasobra cu e ta caba na e cura di Aeropuerto. Bisiñanan no tabata tin un idea di kiko tabata pasando y a cuminsa puntra otro ken sa di algo cu por tin den nan bario cu normalmente ta hopi trankil. Pero despues di un rato e cantidad di auto a bira asina hopi cu nan casnan a keda blokea.
ORANJESTAD – Awe nochi e invitado di e programa Noticiacla LIVE ta Prome Minister di Aruba Evelyn Wever-Croes. E programa lo ta uno en bibo manera semper, cu preguntanan skerpi lansa pa periodista Tito Laclé, y e lo cuminsa pa 9’or di anochi riba tur Plataforma di noticiacla.com esta e website, e app y e pagina di Facebook. Un cantidad di topico lo keda trata, y bo ta keda invita pa wak e desenlace di e programa. No perde! Awe nochi 9’or!.
ORANJESTAD – E fundacion Aruba Birdlife Conservation (ABC), conoci pa ta defende naturalesa, pahra y tur otro aspecto di medio ambiente di Aruba, kier claridad riba e tema di Isla di Oro. Pa medio di un rapport cu nan a publica recientemente, yen di informacion y documentario existente, e kier ‘claridad mei mei di misinformacion’. “Mei mei di debatenan recien y malinformacion riba e status di Isla di Oro, e rapport aki ta boga pa claridad” e conclusion di e documento ta bisa. “E ta enfoca e urgencia constante pa proteha Isla di Oro y ta confirma su tarea den mantencion di e salud di Aruba su estado ecologico”.