HUNTINGTON, W.Va. – John Christopher Spence, 67, a keda sentencia ayera na Merca na 5 aña di prueba federal, incluyendo 6 luna di aresto na cas cu banchi di control GPS, y multa di 5 mil dollar. Tur esaki pa a haci declaracion falso di bancarota. Spence a paga pasashi pa e.o. un vacacion pa Aruba, a disfruta na Aruba, y ora a bolbe a haci un declaracion falso di ta bancarota. E la admiti cu e la haci compra di e.o. e pasashi pa Aruba, asabiendas cu e lo a declara bancarota despues. E la haci esaki cu intento pa defrauda su creditornan pa medio di e proceso di bancarota. Algo cu na Merca ta castigabel pa ley.
SINGAPUR – Riba un buelo di Singapore Airlines di Londen pa Singapur, un pasahero a fayece y decenas a resulta herida den e avion cu a haya su mes confronta cu turbulencia pisa. Por lo menos 30 pasahero a resulta herida. E avion, un Boeing 777-300ER a haye ta haci un aterisahe di emergencia na Bangkok, unda cu e heridonan por a keda transporta pa hospital. Tabatin 211 pasahero abordo y 18 tripulante. Segun radar, e avion mester a baha 200 meter den algun seconde cu a resulta den e turbulencia teribel. Un di e motibonan tambe pa tanto herido ta cu hopi no tabatin nan faha di seguridad bisti.
BUENOS AIRES -Spaña a yama su emhabador bek di Argentina pa tempo indefini. Esaki despues di un impasse diplomatico entre e dos paisnan aki. E presidente di Argentina Milei durante un encuentro na Madrid a yama e casa di e premier Sanchez pa corupto. E la haci e declaracion ey durante un discurso di partidonan derechista populista, organisa pa e partido VOX. Tabatin 11 mil persona presente, entre nan e premier Italiano Meloni. No ta conoci pakico Milei a haci e declaracion ey.
TEHERAN – Presidente di Iran a fayece e fin di siman aki ora cu su helicopter a crash. Ebrahim Raisi (63) y e minister di Relacionan exterior Hossein Amirabdollahian ambos a fayece ora cu e helicopter den cual nan tabata, a cay den ceronan. Mal tempo tabata probablemente e causa. E pais a decretal 5 dia di luto.
DUBAI – E portal Hulandes Het Parool ta raporta diabierna cu e futbolista Quincy Promes a recobra su libertad bou di condicionan special. E futbolista, condena pa traficacion di droga, por warda e proceso di extradicion pa Hulanda, den libertad eynan.
BRASILIA – E Copa Mundial di futbol damas ta tuma lugar aki tres aña na Brazil. Durante e congreso di FIFA na Bangkok, nan a gana e oferta pa organisa e evento mundial aki. Hulanda, Belgica y Alemania hunto tambe tabata den contienda hunto pa organisa e weganan, pero no a logra gana esaki.
CHICAGO – Un ciudadano Mericano cu antes a considera Aruba mucho caro pa bay cu vacacion, awor ta bay pasobra e la caba gana 1 miyon dollars den un loteria di raspa. Ta trata di e homber di Fairvievw Kevin Weaver. “Mi a raspa e ticket den mi truck den un parkinglot y mi tabata den shock completo ora cu mi a wak cu mi a gana un miyon di dollar” Weaver a bisa.