Accion contra trucknan di exterior posponi te dialuna

Posted on 07/14/2017 11:23 pm AST | Updated on 07/14/2017 11:39 pm AST

ORANJESTAD - Despues di un reunion di casi dos ora entre gerencia di DOW y representantenan di chauffeurnan di truck pisa, diabierna anochi 10'or a dicidi cu ta wanta e accion di e chauffeurnan (contra entrada di trucknan di afor) te cu dialuna atardi 5'or. A palabra cu pa e ora ey ta dicidi kico e pasonan final lo ta riba e tema. Ta dicidi entre otro si ta firma un acuerdo entre DOW y e doñonan di truck grandi pa haci trabou pa Mota Engel cu ta encarga cu e proyecto di Watty Vos Boulevard. Mientrastanto director di DOW Marlon Croes a sigura NoticiaCla cu e trucknan di afo, no ta subi tereno local y ta keda riba waf pendiente e aclariacion. Mientrastanto, chauffeurnan di truck grandi lo tin cu entrega nan lista di material, truck y mas pa DOW haya un inventario kico tur ta posibel of no. A bay di acuerdo si cu algun ekipo si por drenta, pa e trabou por continua. Esey e chauffeurnan a bisa di no tin problema cu ne. Ta papia di entre 15 pa 20 chauffeur cu tin negoshi cu nan truck, y ta sinti cu nan ta perhudica. Mas tempran nan a blokia e rotonde provisional na Codemsa, pa haya atencion di gobernantenan. 

  • Green Corridor tin retraso awor debi na ruptura kabel Elmar

    Green Corridor tin retraso awor debi na ruptura kabel Elmar

    ORANJESTAD – E daño causa na e cabel di halto voltahe di Elmar dos siman pasa, lo causa un retraso di por lo menos un luna den e proyecto di Green Corridor. Asina director di DOW Marlon Croes a confirma pa NoticiaCla. Esaki pasobra for di dos siman pasa Elmar a ordena DOW y Odinsa pa para e trabounan di cobamento pa e proyecto di Green Corridor. Croes a admiti cu a ‘pidi’ pa para e trabou te ora cu por sigura cu e compania responsabel pa e trabounan, esta Odinsa, por garantisa cu algo asina lo no pasa mas. Ainda Croes ta wardando riba e documento cu por specifica e peticion di Elmar. E trabounan di reparacion a costa 400 mil florin y ta bay pa cuenta di e compania Odinsa. Mientrastanto awe mainta Elmar a informa cu e kabel ta bek den servicio despues di dos siman di trabou riba dje. E trabounan di Green Corridor mester a keda entrega na luna di augustus. Pero esaki no ta e caso mas awor, y un fecha nobo no por a wordo duna ainda. Foto cortesia Elmar. 

  • Awe NV Elmar ta cuminsa uza e kabel grandi di 60KV atrobe

    Awe NV Elmar ta cuminsa uza e kabel grandi di 60KV atrobe

    ORANJESTAD - Despues di dos siman di e susedido, uzando 27 trahado entre esunnan di NV Elmar y di contratista priva y dos experto di kabel for di Hulanda, awe NV Elmar lo cuminsa uza e kabel grandi di 60KV atrobe. A kap e kabel dos siman pasa, cu consecuencia cu mester a kita coriente den varios area y parti e coriente via otro "feedernan".

  • Falta apenas 1 dia pa encuesta debate di millennials cera

    Falta apenas 1 dia pa encuesta debate di millennials cera

    ORANJESTAD – Falta apenas 1 dia pa e encuesta mas nobo di NoticiaCla y Doc Opleiding cera. Ta trata di e encuesta basa riba e debate politico positivo di Millennials cu a tuma lugar siman pasa diahuebs. E encuesta ta duna un bista di kico e comunidad cu sea a presenta esaki en persona - of e version televisa- ta pensa di e evento. Ademas tin mas pregunta cu ta laga e participante mes contesta e preguntanan haci e anochi ey. E encuesta ta tuma apenas 4 minuut di bo tempo, y ta duna un bista di kico tur esnan participando ta haya di e evento. Tambe e ta duna un bon bista di un grupo specifico nan patronchi di voto, cu ta informacion valioso cu por tene na cuenta pa esnan cu ainda no a dicidi pa ken nan vota, of pa e partidonan tene cuenta cu ne den e ultimo dos lunanan cu falta prome cu eleccion. E encuesta ta cera diabierna algo prome cu merdia. Pa participa na e encuesta, click AKI

  • Bapor crucero a cancela Aruba debi na ex Tormenta Tropical Don

    Bapor crucero a cancela Aruba debi na ex Tormenta Tropical Don

    MIAMI/ORANJESTAD – E loke tabata tormenta tropical Don a afecta Aruba den sentido cu un bapor crucero a dicidi di desvia y bishita Puerto Rico awe envez di Aruba. Ta trata di e bapor crucero Carnival Vista. Carnival Magic tambe ester a altera su itinerario debi na e mal tempo. Mientrastanto e tempo a cambia y Don a desintegra den un ola tropical. Carnival Vista cu a sali for di Miami, mester a yega Aruba awe, pero awor a opta pa baha na San Juan Puerto Rico. Carnival Magic mester a yega Corsou pero a opta pa keda ‘riba laman’. Foto ta di archivo di un bishita previo di Carnival Vista na Aruba. 

  • METEO: Yobida di entre 5-15 mm na caminda pa Aruba

    METEO: Yobida di entre 5-15 mm na caminda pa Aruba

    ORANJESTAD - E ola tropical, resto di Tormenta Don ta bay tin efecto riba tempo di Aruba proximamente.  Segun METEO, e asina yama mid - level vortex di loke tabata Don ta Noord Oost di Bonaire. Esey lo pasa pa 6pm noord di Aruba.  Segun servicio meteorologico, e awacero di awe mainta mientrastanto lo por genera awacero entre 5 pa 15 mm ora cu e ta cla. E potret di radar di Corsou ta mustra e tempo aki aworaki. 

  • A causa destruccion riba dama Husticia

    A causa destruccion riba dama Husticia

    ORANJESTAD - Antisocialnan a comete acto di vandalismo riba nos 'dama husticia' dilanti di Corte di Husticia. Mientras cu e detayes no ta conoci, NoticiaCla a compronde inoficialmente cu un persona ambulante lo ta responsabel pa e acto aki. Confirmacion di su detencion no por a wordo haci. E potret banda drechi ta e estatua den su forma optimal, mientras cu esun banda robes ta despues di e destruccion. 

  • Powered by SETAR